〈打貓〉
一
朝早好涼，行入村嗰陣刮起陣大風。啲塵飛起曬，我擘唔大眼，細佬打咗幾個乞嗤，拖實我。佢係噉問幾時有戲睇？佢最鍾意睇戲。我對眼好痕，勉強見到啲光穿過一排排竹棚跌落地下。祥叔公喺前面等緊，帶我哋愈行愈入。沿路見到好多搭棚師傅，我問乜戲棚仲未搭好咩？祥叔公應我，「邊有咁多戲臺！鬼有咁多戲做咩？」佢解釋最近條村起好多新屋，無計，要發展。細佬係噉問「戲臺喺邊？」祥叔公摸咗摸細佬個頭，「好快啦。好快。」我行慢咗啲，祥叔公語重心長噉叫我哋返多啲嚟，條村變得好快。佢再望吓細佬，嘆咗啖氣，真係後生仔嘅世界。
行行吓，我哋撞到對母女，祥叔公叫住佢哋。原來係佢新抱阿娟同孫女盈盈。祥叔公個仔大我哋十幾年。聽講我哋未搬出村前成日照顧我同細佬，但我無乜印象，畢竟都已經係小學二年級前嘅事。盈盈望落都係七八歲嘅樣，佢一手拖住阿媽，一手抱住隻貓仔。貓仔白雪雪，好可愛，細佬想伸手同佢玩。盈盈退後咗啲，細聲話咪咪瞓緊覺，唔好嘈醒佢。細佬又問幾時可以睇戲，我無應佢。我見阿娟份人好靜，着得有啲老土，突然醒起之前聽過有個堂哥做中港貨車司機，近年娶咗個大陸婆，擺酒冇耐就生咗個女。我哋成程無乜嘢講，無嘢好講，只係想快啲走。
二
望住眼前嘅巨型竹棚，我知我哋到咗。個棚真係好鬼大，一碌碌發灰嘅毛竹臨時交織成格狀嘅網，有種茁壯嘅生命力。棚下有個約莫三十歲嘅男人，行近同祥叔公打招呼。祥叔公笑住講，傑仔係大我哋一年嘅堂哥，遲啲會喺村擺喜酒。傑仔話我哋可以叫佢David，佢中文講得唔係好好，但聽係完全無問題。David同祥叔公講，香港搭棚功夫真係勁，同佢喺英國見嘅好唔同。祥叔公話搭棚都算係香港特色，以前戰亂嗰陣，好多搭棚師傅由廣東落嚟定居，開枝散葉，啲竹棚就噉落地生根，喺依座城市嘅罅隙見縫插針成長。「不過依家好難揾到人接班囉！」祥叔公話。David笑住答，點會呢，好似佢都海外回流返村啦，唔會無人傳承。「搭棚有商機，但嫌依家唔夠有系統同效率。」
「呀呀呀！」細佬踎低想同貓仔玩。貓仔懶理，將頭埋喺盈盈嘅心口，盈盈睥住細佬，阿娟將盈盈護喺身後。我叫細佬起身唔好嘈。祥叔公向David介紹我哋，珠女、光仔，同村嘅堂細佬妹。「喺村出世嘅龍鳳胎，當時真係不得了！佢哋老母肚皮夠爭氣，一下子湊夠個『好』字！」我見阿娟頭耷耷，拖實個女，無聲出。
「喵喵！」細佬指住隻貓。我想拉起細佬，佢好重，硬頸嗰陣更重。「喵喵！又話睇戲！又話睇戲！姐姐呃人！呃人！」光仔乖啦，好快就有戲睇，跟住我哋就返屋企，我直程係求佢。佢無理，繼續揈手揈腳，每一拳都係成年男人嘅力度。我愈用力拉起佢，佢掙扎得愈勁，我就嚟捉佢唔住。祥叔公同David想過嚟幫手，但我拒絕。我feel到塊面好㷫，好想好想快啲走。
「光仔！係咪想我唔要你喇？」我好大聲，佢啲五官即刻揦埋一舊，個身停咗無郁。我好聲好氣噉話「你噉樣會嚇親咪咪。你係咪想嚇走咪咪？」佢立即將手放喺嘴上，撳實唔畀任何聲音漏出。
三
戲棚靜到好得人驚，好似原本屬於依度嘅嘈雜聲被人抽走晒，空虛。「祥叔公，幾時開始破臺儀式？」我就嚟頂唔住。祥叔公話應該差唔多。David問今朝做咩戲，祥叔公笑答，打貓！盈盈大力抱實，貓仔好似不安噉叫咗幾聲。祥叔公向David講解，等陣臺上會有白虎扮食生豬肉，然後武財神玄壇會用鐵鏈制服佢，期間所有人都唔可以出聲。一出聲就會被凶星白虎纏身，唔死都成世慘。「囡，唔駛驚。」好似係我第一次聽阿娟講嘢，佢把聲幾沉，語速好慢好慢。David問我哋平時住喺村嘅邊度，佢擺完酒後會搬入嚟新屋住。祥叔公搶先答我哋老竇要定期洗腎，所以搬咗出村好耐。「唔係今次戲棚起喺佢哋舊屋前，我諗都請唔到佢哋返嚟！吔！珠女你都唔細，幾時到你結婚？」我望住我細佬，唔識應。祥叔公指畀David睇，戲棚後面隱約可見嘅舊式三層村屋。同入村見到嗰堆新式洋屋設計好唔同。
有人好急噉揾祥叔公，應該係戲班嘅人。佢哋同David行開一邊傾，剩低我、細佬同兩母女。細佬隻手仲放喺嘴上，我叫佢放低得啦，等我可以拖住佢。我哋之間冇人講嘢，得隻貓間中喵喵叫。班男人愈嚟愈嘈，我好似聽到戲班嘅人話，演白虎嘅武師出門嗰陣扭親腳，嚟唔到。
「我哋真係揾唔到人頂替。」
「阿材，一係我再畀多啲錢，你拍硬檔幫我揾個人嚟做！」
「祥叔，已經唔係錢嘅問題。本身已經無乜人願做祭白虎，嫌煞氣重，你今次嘅廟同棚都移過位！依家咁邪，個個都驚惹禍上身。」
「我哋重金請風水師傅揀嘅福地嚟㗎！臺戲點都要做！」
「材叔，有啲嘢唔使畫公仔畫出腸。為咩移，行內人都心中有數。」
嗰邊都靜埋，盈盈細細力摸貓仔嘅白毛，「噓！噓！」，佢甩咗門牙講嘢漏風，似足依家風吹過竹棚嘅聲。David話，噉都冇辦法，不如延期或取消。祥叔公好激動，大喊有啲傳統係無得唔跟，今日搞唔成，以後我哋依房人喺條村都冇埞企。風四方八面吹起，啲塵搞到我對眼好敏感。「一係我上去演！」我望住阿娟，阿娟望住我。有無聽錯？祥叔公成七十幾歲人點喺臺上面爬？更何況佢喺村算係有頭有面嘅長老。戲班嘅人嚇親，點得㗎祥叔，你唔後生喇，有啲咩事擔當唔起。祥叔心意已決，今日做唔到打貓，無人走得到。我知祥叔公唔係話個人走唔出條村。戲班嘅人好擔心，話以前有條友演白虎嗰陣，唔小心跌咗落臺，嗰年佢個細仔就香咗！David笑咗，咪咁迷信。阿娟忍唔住開口，同我講佢細個嗰陣睇過族人跳菟舞，其實都一樣。佢哋用墨汁喺臉同身畫滿虎紋，頭貼白符，用虎姿起舞，口嚼生肉，跳完就到河邊沖走墨汁同香灰，沖走災厄。成個感覺係好平和，而唔係恐懼。不過大陸依幾十年要去鬼神、破封建，所以⋯⋯阿娟無講落去，我都唔關心，佢令我聽唔到佢哋講緊乜。好似David想頂上，雖然佢唔信，但手上揸住唔少村內嘅工程。祥叔公唔肯，傑仔你就嚟辦喜事，搏唔過。「珠女！不如你問吓光仔肯唔肯幫手？」阿娟好大聲講，足以令棚外嘅所有人聽到。
全世界靜晒，我扮乜都聽唔到，低頭望地下。手心好濕，唔知係我定係細佬嘅汗。過咗陣先有堆腳步聲愈行愈近，我個心跟住震。「珠女！」祥叔公叫我，我無回頭，直至佢哋走到我哋面前。
「珠女！你都知吉時要做祭白虎酬神，神功戲唔可以耽誤！個武師臨時有啲事嚟唔到，時間無多，你叫光仔幫幫手，好冇？」祥叔公把聲好似好遠噉。我眼定定望住地下竹棚嘅影、人嘅剪影，唔知講咩先好。
「珠女！依個唔單止係我哋房嘅事，仲係成條村嘅事！今年個廟同棚都搬喺你哋間屋附近，神靈睇唔到戲，怪罪落嚟，開眼第一個見到就係你屋企！珠女！你諗吓光仔，你諗吓你老竇！我哋無得揀呀，珠女！」祥叔公把聲就喊，我啲眼淚都忍唔住滴落嚟。我一直都唔信，乜揀喺我哋舊屋前起棚真係因為風水咩？
「珠女！當祥叔公求吓你哋！我睇住你哋大，唔會害你哋！光仔由細到大都鍾意跳跳紮，今次只係喺臺到玩一陣啫，無分別㗎！三分鐘！臺戲只係三分鐘！」細佬發現我唔妥，大大力搖我隻手臂，「姐姐！姐姐！」我衫上嘅淚痕愈滴愈多。
祥叔公對細佬講，光仔想唔想上臺玩？好好玩㗎！細佬無理，只係不斷搖我。祥叔公講，你哋都想快啲完咗之後返去，係咪？我咬實牙，抹過眼淚，抬頭同細佬講，光仔乖，我哋玩個遊戲。細佬話，姐姐唔喊！姐姐唔喊！光仔乖！我笑住點頭，光仔乖。
四
戲棚內好焗，比外面熱好多，一啲風都無。好多氣味撈埋一舊，汗臭味、尿餲味、搭棚工人遺留嘅煙頭味、拜神嘅元寶蠟燭味、戲服嘅罨味。後臺昏暗，氣氛肅穆，人唔多。個個都避免同人有任何眼神接觸，尤其係我哋依啲外來人。細佬腳步愈嚟愈慢，佢無講咩，但我知佢好不安。有個男人行過嚟，想請我走，淨係帶走細佬，我唔肯。我塞咗封利是畀佢，知佢係衣箱佬，戲班班主有同佢交代成件事。衣箱佬望咗我陣，搖搖頭拎住封利是走咗。我望住掌心一撻撻紅印，祥叔公封利是甩色，我將啲紅色手汗擦走。
「姐姐，不如返去。我唔想玩貓貓遊戲啦。」
「你唔係鍾意貓貓咩？」我嘗試放軟把聲。
「我想同姐姐一齊。」
「光仔乖，你上臺扮貓貓，扮完我哋就可以返屋企。姐姐會一直喺臺下望住你。」
衣箱佬行返嚟，攞住虎衫同虎頭。細佬更加唔安樂，手腳又開始亂揈。平時我盡量由得佢，但今次真係唔得。「光仔！係咪唔想返屋企喇？」細佬立即將手放喺嘴上邊，好乖噉擘大對眼望住我。衣箱佬輕聲同我講，依家幫光仔開面，會喺佢額頭搽胭脂。佢話雖然光仔唔會露樣，但素顏出臺始終都唔吉利，尤其係做白虎。
「一旦開完面，光仔就唔再係光仔。你要記住。做完戲前，所有人都唔可以出聲。」
我擘大眼等眼淚唔好咁易流出，摸咗摸細佬個頭，叫佢繼續唔准講嘢，唔係會嚇親貓貓，仲有要聽叔叔話，叔叔會睇住佢。
細佬點頭，我望住衣箱佬好細心噉幫細佬着虎衫，成個過程好漫長，套虎皮似係個過鬆嘅影子，慢慢吞噬細佬原本嘅身體。最後，衣箱佬幫細佬套上虎頭。眼前嘅人已經唔係我細佬。
衣箱佬帶白虎去右邊嘅虎道門等。衣箱佬嘅眼神明明白白話我知，「你無可能陪佢成世」，但我竟然睇唔清白虎回頭望咗我幾多次。
五
點炮仗，鑼鼓響，各就各位，全場禁言。玄壇拎住霸王鞭衝向前臺，又喺衣邊虎道門返後臺。條鞭綁住串點着咗嘅炮仗，霹靂啪喇，一來一回橫掃前後臺。玄壇之後行天幕後嘅通道，喺雜邊虎道門正式上場亮相。玄壇攞出跳大架嘅功架，走匀前臺四角驅煞氣。祥叔公好滿意，跳得好！跟住，玄壇行去臺上嘅木枱前，面對觀眾席，一時低頭瞌埋眼，一時又擘大。David皺眉，唔明嗰個着黑四色褂嘅男人做緊乜。玄壇踩上木枱，扮要上山揾虎跡。珠女望實個臺，唔夠膽眨眼。白虎被人推咗上前臺。光仔覺得虎頭好重，又阻住睇嘢。戲班班主默唸白虎出場要彎身，隻手要虎爪形。光仔記得明哥幫佢着衫嗰陣，千叮萬囑佢要彎腰扮虎行。虎衫好唔啱身，光仔行得遴迍，試咗幾次個身都彎唔到，唔知點算。最後佢企住行，望落似熊人多啲。盈盈見到白虎咁盞鬼，忍唔住攬實貓仔嘻嘻笑。珠女見光仔左腳撠右腳，就跌就跌噉，恨不得喺臺上嘅係自己，眼淚抹極都有。白虎喺臺上氹氹轉，睇嚟無行去枱邊嘅打算。玄壇望住掛喺枱腳嘅生豬肉，心諗白虎一日未食，一日未打得虎。光仔想除咗個頭套，佢望唔到姐姐喺邊。臺邊嗰三個鑼鼓佬望到好心急，無人可以開口提白虎，大鑊！鑼鼓點愈敲愈急，的查查查查查查，光仔覺得頭痛到爆，唞唔到氣。
「喵！」白貓掙脫盈盈嘅懷抱，向遠離戲棚嘅方向跑走。
棚內嘅第一聲。第一聲來自原始本能嘅嘶喊，搲爛依場儀式嘅禁忌。
可惜白貓嘅叫聲微弱，好快被鑼鼓聲蓋過。
「咪咪！」第二聲。
盈盈見貓仔走甩咗，忍唔住高叫貓仔嘅名。祥叔公聽到孫女嘅聲，難以置信噉望向阿娟。
「快回來！」第三聲。
阿娟見盈盈跑得好快，差啲撞到碌竹，一心急就用返母語大喊。戲班嘅人好驚，不祥嘅預兆。「姐姐！姐姐！你喺邊？」第四聲。光仔把聲隔住頭套唔係好清。三個鑼鼓佬心諗今次無喇，凶多吉少。白虎撞到張木枱，跌咗喺臺上。珠女見光仔遲遲未起身，想衝上臺，但被祥叔公拉住咗。祥叔公無講嘢，只係不斷搖頭。珠女望住David，佢無打算幫手。喺一片混亂中，玄壇心諗場戲點都要完，反正依家已經衰到噉，都唔爭在補多腳。白虎嗰頭離塊生肉唔夠兩尺，玄壇將生肉踢近少少去白虎嘅頭，就當佢食咗。佢細細力踢咗吓白虎，好似無反應。唔理啦，玄壇通過臺面條闊罅，將生肉踢落臺底，然後騎上虎背。光仔畀人一壓，立即起勢咁叫，好重！好重！玄壇想將佢往後拉，光仔好激烈反抗，連虎頭都甩埋。光仔勉強見到臺下嘅姐姐，用盡力想爬過去。珠女見到光仔塊面壓到豬潤噉嘅色，忍唔住嚎哭，揞住個嘴發出嗚嗚嗚嘅聲。玄壇再次將白虎壓喺胯下，明哥喺後台行咗出嚟，光仔認出佢，喺地板發出咿咿呀呀嘅聲想求救。明哥將佢手上條鐵鎖鏈遞咗畀玄壇，然後去執起虎頭，將佢重新套落光仔個頭。光仔唔明，眼白白望住個世界再次變成漆黑。明哥聽住光仔係喺頭套內嘅怪叫聲，個身扭成一團，都好心酸。明哥心諗光仔乖，你戴住頭套，等陣條鐵鏈先唔會傷到你。玄壇用腳夾實光仔，將鐵鏈捆喺白虎嘅口，令白虎唔可以再開口講嘢害人。明哥幫手，手勢又快又温柔，確保條鏈已經箍好白虎。明哥默唸，光仔捱多陣就得，捱多陣就得。佢唯一做到嘅嘢就係令儀式愈快順利完成，光仔就可以愈快解脫。嗰三個鑼鼓佬未曾見過今日噉嘅場面，嚇到以後唔敢再接依條村嘅生意。白虎被成功降伏，任由玄壇騎住，齊齊退向衣邊虎道門。按照規矩，即使行緊返後臺，佢哋都要對住觀眾席演到最後一刻。玄壇全程見住珠女點樣衝去後臺，又點樣暈咗喺路上。
鑼鼓點停，後臺傳嚟「喎呵」聲，禮成。棚內多咗村民出出入入，多返啲人氣。做完《祭白虎》酬神，就到例戲《八仙賀壽》娛民。八仙等陣會拋啲餅乾糖果落嚟，個個都急住揾個靚位接福氣。有人講起頭先有對姐弟喺棚內暈低咗，送咗去村公所唞唞先。一齊暈咁邪，邊個嚟㗎？有個師奶問。你唔識㗎喇，祥叔嗰邊啲人，無喺條村住好耐，阿婆答。要唔要送去醫院望吓？師奶驚驚。今日咩日子，點可以叫白車入村㗎！阿婆啋咗聲。鑼鼓再響，提村民盡快入席。師奶守住自己得嚟不易嘅靚位，問阿婆覺唔覺今日個棚涼涼地？阿婆噓咗聲，叫佢準備專心睇戲，咪出聲。臺上八仙初登場，所有人拍爛手掌，將啱啱聽到嘅八卦拋諸腦後。
棚內有股風，弱到連塵都吹唔起，微到近乎令人感受唔到。風喺棚內兜咗圈，靜靜噉穿過戲棚，穿過村公所，穿過村內高高低低嘅新屋搭棚，穿過一户户人家。
*